《少年工‧新玻‧竹東‧李增昌》作者李增昌序：泉水緊打水緊來

自序  泉水緊打水緊來 

國語个普遍，使得傳統个話語沒落，阿公阿婆在日常生活中，講捱俚个客話，講自家个母語，不管海陸、四縣、饒平等等，總感覺當親切燒暖，感覺係自家人。在異鄉相見，若係無相識个人，有講起自家共樣个語言，馬上感覺像相識樣。

時代个進步，電視電腦手機資訊通訊，一律用國語，緊來緊聽毋到母語，牙牙學講話个幼稚班，鴨嬤度子一大群，小姐老師帶路，嚌嚌借借1講國語，山頂原住民唱歌跳舞食酒相罵相打乜係用國語，再聽毋到佢兜个高山話。捱自出世就講个海陸客話也緊來緊無人講，講分後生聽，總係聽毋識。

寫這本書，當初乜係用國語寫，有一個翕相同事講，客家人个故事愛用客家話來寫，捱自八歲到滿伯公自辦个私塾學堂學念「人之初」，斯會「人之初性本善，狗拖犁滾滾輾2」，日本時代公學校高等科讀日本書畢業，根本無漢文基礎，愛寫客家文等於係撐無底船，七鬥八鬥寫出个客家文，摻雜國文，內容係從幼年到小學高等科畢業，戴軟橋花草林半山林田庄生活紀實，以及回想日本少年工、新玻食頭路種種生活內容，這擺打幫古少騏小姐耐心整理文圖又來加減修改，面皮賁賁3，勉強出版，希望客語文化流傳萬年。

九十五歲細老弟 李增昌

1.嚌嚌借借zi11 zi11 zia11 zia11：鳥聲，用來形容當多人共下講話个聲。

2.輾chan11。

3.賁pun53：厚。