《少年工‧新玻‧竹東‧李增昌》書摘：阿公飼奶

橫山大山背，1960 年代

即時就會斷烏大暗，山肚个暗晡時，神桌頂一盞燈盞火1，灶頭面一盞燈盞火，斯像這下兩燭光電球恁光定定，這以外四面全部烏疏滴溚，伸手不見五指，所以臨暗頭做事愛打緊板2，遽遽牽牛食草食水，餵雞鴨頭牲，禾埕晒日頭个鹹菜菜脯、衫尿裙，柵籬頂頭介菜仁遽遽收起來，大家輪流洗身腳以後，在廳下共下食夜，一頭食一頭講今晡日个大細事。

阿公：戇孫！你肚屎枵囉，若姆當無閒，對該煮夜飯，阿公飼3你食啦！

戇孫：戇阿公𠊎肚屎當枵，遽遽分𠊎食哪！

戴在山林壁壢角大山背盡孤栖，後來就通盤徙徙出來囉。

古小姐跈等打嘴鼓

增昌先生个後哀，戰後在大山背買有五甲杉園，頭擺杉仔當有價，五甲杉園斬一擺賣有二十八萬，這兜錢拿來起三間屋，斯係這下戴等个雜貨店摎隔壁、對門。阿姆有吩咐增昌先生，有事無事愛去巡杉園看頭看尾。

在大山背國民學校運動場崁下有一間泥屋，分管理杉園个佃人戴，佃人耕五分山田，割到个穀摎頭家一儕一半，菜園雖然由在佢種，還係盡艱苦過日，愛加減摎人做工做事正有好生活。相片底肚个阿公，斯係佃人余阿順先生，佢到這位戴有二、三十年，一直到李屋摎杉園賣忒正徙出去。

1.燈盞火：油燈。2.打緊板：較遽兜。3.飼ci33。